La stimana che ven, el Fugati (che sarìa el capo dela Provincia) el va en Brasile. Migrante de lusso a véder come che i à tratà i nossi migranti sti ani quanche i è nàdi via dal Trentin parchè ghèra fam e la Provincia Tirolese no la ghe dèva contributi, come ancòi, ai contadini. Zentozinquanta ani è passà da quel an – l’era el 1875 – quando che i nossi vèci i à passà el mar. E tanti no i è pu tornadi endrio. Giusto che el Fugati el vaga a véder così el ghe mèta dentro el nàs. Forsi el capìs quant che à strussià i nossi. I me diss che ghe va drìo el Bèpi Ferandi, quel che doverìa saver la storia. Così forsi el ghe la conta giusta al Fugati. E i me dis che i lo porterà avanti e ‘ndré par el Brasile come ‘na Madona pelegrina. Propri la stimana che a Roma i doverìa decider se ala prosima elezion i lo farà crodàr zo dala caréga. Quel che no capisso l’è la festa par i 150 ani da l’emigrazion trentina en Brasile. Parché l’aniversari i lo tira en qua e ‘n là ormai da mesi, come el lastico dele mudande. Ma se tut el pol servir a far cambiar la zuca ai zuchi, che se faga festa. Parchè, chi da noi ghè poc da festegiàr, come ne conta el Potachin da Càden che l’è tremendo de legenda.
E po’ i va en cesa… Zerti politizi che i ne governa, i g’à en coragio da leon. Se trata de quei che comanda, che i g’à la ciave del vòlt e la borsa dei soldi. I altri i sta al’oposizion, convinti che sia en pontesèl da ‘ndo vardar zo quel che suzede.
Se ghe vol coragio a ciavàrsen dela pora zent; de quei che, disgraziadi lori, i è costreti a dormir per tera, al fret, al vent e sota l’ acqua. Finchè l’è istà ancor dai, ma adess te bati brochète a star for la not. Però, ai politizi dala corona fazile e dala panza piena de aumenti dele so’ indenità no ghe enterèsa gnènt del fret e del’umit. Lori, per el ben del noss Trentin, i sa quel che ghè da far: zero ospitalità; zero posti al coert e zero lèti. Che sia omeni o fémene, che i se rangia o i vaga en Comun. Lì i prova ben a far qualcoss, ma le forze l’è quel che l’è e anca i soldi no l’è quei dela Provincia.
Fora en piaza Dante, entratant, i è dei veri “duri” e i à deciso, sempre fra ‘na giaculatoria e ‘n piazeròt, che i “barboni” e anca le “barbone” i pòl restar a dormir sui cartoni, senza tant roter i coioni. Da “duri” a “dughi” el pass l’è en pass.
I politizi no i g’à temp per zerte rogne. I g’à da nar a messa, per ricordarse de San Francesco, che el parlava ale bestie. Adess no i ghe parla pù ma, en compenso, i ghe sbara. E quel fagòt de strazi che dorme en tèra el pol anca morir. Orsi, lupi e cristiani: quatro rompibale de men. No ghè temp per ‘ste miserie. El Vangelo i l’à scrit perché lori, i Salvini i lo pòda dropar per parlarne de solidarietà, che tant le ciacere no le costa gnent. Entratant, i va ‘n cesa e po’ al’osteria e dai pompieri e dai alpini e dai cori e dale bande, che tut fa brodo per tor su voti. Quei sì che l’è trentini veri. E i “barboni”, i lo sa tuti, no i va gnanca a votar. Vergogna!
©Potachin da Caden-iltrentinonuovo.it