Polenta e tonco; tonco de pontesèl; tonca ti che tonco mi; ma set tut tonco? Entant a Trent i fa le feste “vigiliane” che vol dir de la vigilia perché la festa vera, quela de san Vigili (che quei de la Rendena i se l’ha lassà scampar e non lè vera che l’è mort copà), la festa, se diseva, l’era quela quando se magnava polenta e tonco. Ghè anca ‘na canzon che i mete su i zoveni: “Ho visto lei che tonca lui, che tonca lei, che tonca me”, o na roba del genere. Par le feste vigiliane i ha toncà tuti tant per no toncàr sol chi che gà en man el tacuin che se el fussa toncà da sol el poderìa averne a mal. E magari non pagar pu el cont. Ma el Potachìn da Càden, che qualche volta el scrive anca chi, el gà da dir la soa. E noi ghe la fen dir.
E se fussa da toncar i toncadori? Ogni an ariva la “tonca”, che ‘na volta la provava a pestolar, ben o mal, el prà dela satira e adess la dà en colp al sercio e uno ala bot, che pù democristiani de cossì… Sicur che qualcheduni ride (soratut se ‘l se fa gatizole), ma altri – tanti – i pianze. La satira no la varda en facia a nissuni, envezi de evitar che qualcheduni ghe ‘n abia en per mal. Epura no l’è che manca i argomenti…
En me socio el diss che forsi ‘na toncadèla se podeva ben darghela ala Giorgia che l’èi nada al’aereoporto en pompa magna (che en Italia se magna sempre qualcoss) a darghe el benvenuto a uno che, ben che la vaga, l’è stà e l’è en preson acusà de aver mazà ‘n om. Sarà ben che la giustizia ‘mericana la fa vegnir el lat ai dinòci, ma tuta ‘sta comèdia forsi se podeva anca ‘sparmiarsela, o no? E, ‘ntratant che le maestre dei popi le sacramenta per en mess de pù de scòla, el ministro ala “cultura” l’à dit che Cristoforo Colombo l’à circumnavigà el globo basandose sui calcoi de Galileo Galilei. Benon, se ‘l lo diss lù che l’è ministro, sarà ben vera. A mi me pareva che Colombo el sia mort nel 1506 e che Galileo el sia nat nel 1564 e che Galileo Galilei l’avessa enventà la Cassa de Risparmio e alora i g’à entitolà ‘na strada a Trent.
E ve la ricordé quela De-putata che voleva riscriver la Costituzion per dir che la Camera la doverìa ciamarse “delle Deputate e dei Deputati”, che ne sen sentidi deputadi tuti a rider?
E la Valdastico, che i l’à scominziada Sesanta ani fa, po’ i l’à sospesa nei ani Setanta, po’ i g’à ripensà nei ani Otanta, po’ i à lassà lì nei ani Novanta, po’ i l’à tòlta fòra nei ani Domili e adess ‘l Fugatti el farà la variante urbanistica e l’asfalto el meteren, se la va ben, nel 2124, quando anca el ‘lastico el se sarà crepà.
E quei candidati che no i ciapà gnanca el voto de sé stessi e dopo i se ‘ntéroga da so’ posta sul’ astensionismo? O quei del PATT, che è deventà quei del PIT e che con en SPOT i vol governar la PAT? E che dir del MART, che no l’è en pianeta e no l’è gnanca ross, che se no come févelo a far ‘na mostra che la prova a sbiancar el nero? E quei dele Feste Vigiliane: ‘na sagra de missioti co’ l’idea de eser en Palio. Forse l’è. Ma raglio.
‘N ultima zicola. L’è vera che no ghè ‘na gramatica del dialèt e gnanca regole scrite per scriverlo mejo, ma en cont l’è rangiarse col dialet che se cognoss, e ’n cont l’è tor per i cojoni chi che lo sa con en dialèt che l’è tut for che dialèt. Sol en missiot de taliàn con dent qualche roba che ghe ‘nsomia al dialèt de noaltri. Gianizeri, Tonca!
A proposito: el Giorgio, che da ‘n pez el se fa toncàr al posto de i altri, ades l’ha dit che no ‘l vol pu farse toncàr en de l’Ades. El gà reson. Che i se tonca lori, i toncadori.
El vos Potachìn da Caden