Entant che i spéta che la Region la ghe aumentia el stipendio ai dipendenti (che i suda da mati, ma i dis che l’è colpa del calt), cossì dopo scàta l’aumento anca par lori (i siori consiglieri) che i ghe n’à propri bisogn, el Potachin da Caden, sentà su ‘n paracàr de sass el m’à fat en ragionamento che no ‘l fa na grinza. El l’ha ‘ntitolà “farse i dispeti”. Mi dirìa “farse e dispeti” ‘n do che le “farse” l’è quel comedie da rider e i “dispeti” quele comedie da pianzer. Bòte da orbi e làgrime par tuti, alora.
Come i bòci e, anzi, pezo dei bòci.
I se fa i dispetòti, le beghòte, le lengue entant che chi va tut a remengo.
Come i matelòti nei spiazi.
– Te m’ài votà contro? E mi te cavo via la vice presidenza!
– T’ài scrit ‘na letera che no me piass? E mi te meto a netar su en tera, cossì te ‘mpari a roter i co… (sideti)
E questi i g’à la pretesa de comandarne e de ‘nsegnarne come che se fa a nar avanti. ‘Na manega de bociarìa, che scambia la Provincia per el polinàr de so’ casa. Avanti de sto’ pass ne resta sol le zinzorle, ma i begaherà anca lì per chi che stà su de pù. Come col terzo mandato, che no l’è la terza volta che “ti ho mandato in m..”, ma sarìa la terza volta che en m… ghe nen noialtri.
Ma voi se boni de enmaginarve ‘na riunion dela Giunta provinciale? Pol suzeder sol dopo ‘n indigestion de canederli, però g’ò idea che la poderìa eser, zirca, cossì:
– La seduta la è daverta!
– E alor sèrela che la fa ‘n giro d’aria e co’ sto’ calt ne ciapan su qualcoss!
– Argomenti al’ ordine del giorno: nomina dei diretori dei musei!
– Dai, che tiran le brusche e chi ven, ven. L’è pù democratico, o no?
– Pur esendo d’acordo, esprimo voto contrario!
– Chi èlo che m’à ciavà le zirèle?
– Mi no son stà. Ero drio a repezarme el lastico dele mudande, che el s’à crepà entant che pensavo.
– Silenzio, che adess parla el capo!
– Cari asesori, volerìa ricordarve che el balon l’è mio e se me rotè le aze ciapo su, vago a Roma, e ve lasso chi come i dughi.
– Ma se calan i mandati, poderessen aumentar i asesori, ah?
– Bona idea e alor voto contro!
E cossita i passà le giornade. I tirà quatro euro de miseria e i lo fa per noi. Demò per noi, che per lori no i lo farìa mai. Ala prosima bega.
Saluti dal voss Potachin da Caden