Prima de darghe la parola al Potachin dal Caden ve conto quel m’è capità jeri. Son nà a zercarme en tòc de polastro za cot, per non scaldar padèle en casa che za fòra se boie. Vago ala Coop e ho ciapà en colp. Ostrega, me son dit, ho ben capì che i prezzi i sgola, ma s’hai messi a vender polastri de oro? Vardà la fotografia che ho fat mi, no la “inteligenza artificiale” come che i la ciàma. Mi, giuro. E vardà el bigliet tacà al polastro: “Pollo allo spiedo Coop: prezzo 1220,10 euro.” Ma sente deventadi mati o chi che ha batù i prezi l’à ciapà en colp de sol? I commessi i s’à messi a rider, la capo-commessa la s’à metuda a pianzer. El polastro? El taseva come en cunèl serà en del nailon.
Cossa èlo suzzest? Colpa del computer, del “sistema informatico” della Coop o de quel dell’Azienda sanitaria (che l’èi anca vizina de ufici)?
Fati doi conti è vegnù fora che el polastro el costava 4,90 euri ma che sul scafàl ghèra 249 tòchi e alora, moltiplica 4,90 per 249 vèn fora el prezzo mat de sora: 1220,10 euri. Sarò brao de far doi conti a man, o no? Entratant quei de l’Azienda sanitaria i suda. Ma no dal calt. Dala vergogna.
Ma se va tut benon, come che diss sempre la dirigenza de l’ASUIT, perché el sistema informatico el va a farse ònzer en dì si e l’altro anca? E se non l’è el Pronto Socorso, l’è Chirurgia e se no l’è i Ragi l’è la TAC e la Risonanza Magnetica. A proposito, da mili e mili ani nel bosch de Panevegio ghè i pèzi de risonanza. Postéghe lì el malà su per la pianta dei pézi de risonanza (che fa anca rima) e vederè che i risultati i è pù veloci che quei de l’ASUIT.
A vardar ‘sti mesi, passadi fra ‘na crisi e l’altra, no ghè da star alegri.
Zerto nel gazèr qualcoss se salva ma, pù che altro, par che sia sol question de cul. Funziona la Urologia? L’è perché i pissa de men, per via del calt. Va ben Gastroenterologia? L’istà se magna pù lizer; Geriatria no la g’à problemi? I pazienti, a la so’ età, de qualcoss i doverà pur morir.
L’asesor ala Sanità el se sforza, el fa riunion, el decide strade nòve e po’ el deve anca seguitar a dir che tut va benon, sianca el sa, lù per prim, che no l’è vera… Tuti i dì, medizi e infermieri i se fa en quatro/oto/ sedese/vintiquatro ma, ala fin, l’è anca lori dòne e òmeni e no i è de fer. Tuti, ensoma, i zerca de far qualcoss per migliorar ‘na Sanità che l’èi pù malada dei so’ maladi. Sol la dirigenza del’ASUIT l’èi tranquila e no la fa gnent, né ancòi, né algeri, né doman. Amen.
Entratant i pazienti, che po’ sen noi, i conta le so’ passion perché no ghe resta altro da far. Ghè uno che diss che el spèta la visita dal gastroenterologo; ‘n altro che l’è malà de vagina pectoris; ‘n altro ancora che el g’à alti i ovuli bianchi e quel che diss che el g’à l’alluce calvo. I domanda ‘na visita e la risposta del’Inteligenza Artificiale l’è: chissenefrega! D’altronde de artificiale ghè anca l’educazion. Problemi di circolazione? Domandeghe al vigile urbano. Problemi de liquidi? Domandeghe a ‘n idraulico. Problemi de òssi? Basta rivolgerse al becar.
Entratant al’ Azienda i va en ferie, come tuti a Feragost. Se però i restassa en ferie… Purtropo, envezi, i torna. Per far content el benzinar.
©elpotachinda caden-iltrentinonuovo.it