Quando se diss: le disgrazie. I m’à lassà sol con me neó. El g’à sei ani e l’è zà drio che el se laurea en “informatica e inteligenza artificiale”. Bisogna sforzarse de capirli i zoveni e alora g’ò dit de parlarme come che i usa en trà de lori. L’è partì come en bolide. Sentà sula banchéta e con en man en “Kinder” che sgozava ciocolata dapertut, l’à scominzià a dirme:
– Vedet nòno, ghe dele APP che le te fa deventar CONTENT CREATOR.
(Taso. Penso che sia en canto gregoriano e me preparo e entonar la voze.) Entratant el bòcia el neva avanti:
– Per deventar ‘n INFLUENCER te devi star atento ai CRINGE. I ghè dapertut e i te mete en le rogne.
(Tògo en man ‘na zavata e te vedi ben ti cossa che resta del Cringe se ghe meto le man).
– Nòno, no sta mai a SPOILERAR gnent de quel che te g’ai en ment de far. Vardete dai HATER e sapi che, da ‘n moment a l’altro, pol capitarte en RANDOM che l’è ‘n atimo farte TRIGGERAR.
(Scolto e penso a quel che ò beù. No pòdo aver fat la bala demò con ‘na bira).
El bocèta entant el seguitava a spiegarme. Senza pietà. Ormai vardavo en le verze, pers dal tut, ma lù ‘l continuava a ciacerar:
– Se te provi, nòno, en SMASH per ‘na dona…….
(O’ subit pensà che “Smash” sia el rumor dela dentiera che se destaca e son corest a torme el Kukident. El matelot l’ò lassà sol, ma nol s’à gnanca nascort e l’à seguita e sbrodolar parole senza senso).
– Alora BRO – el m’à dit a ‘n zerto punto – co’ le done stà atento al to’ BODY e al to’ DRIP, perché le GIRLS l’è la prima roba che le varda, se te vòi proporghe en WEEK END. No stà a FLEXAR e insister se le diss de no, perché poderìa esser MOBBING. No sta farghe SELFIE sianca che te g’ài en CRUSH e me racomando: KEEP CALM.
Po’, per fortuna, g’à telefonà El on Musk e l’è nà en la so’ stua.
Doman vago dal medico. Ve saludo: BROTHER.
©El Potachìn da Càden