Na volta gh’era l’aquila, ma forsi la sa stufada (o l’ha tirà en crèp), se l’è vera quel che ne conta el Potachin da Caden. I tira for la farfala, quela ‘nventada da Cesare Battisti e spolverada dal Malossini quando che l’era asesor al turismo. Na farfala e ‘n zigaret, i diseva sti ani, no se ghe la refuda a nesun. E cossì, al cantante che sti ani el n’ha compagnadi en le prime smorosade i ghe darà na farfala. Forsi i n’à trovà qualcuna desmentegada dal Malosini en den casettin en qualche uficio dela Provincia. O forsi en piaza Dante i s’à resi cont che le aquile le è stampade sule bombe che i mericani i sgancia en giro par el mondo… E non le farìa far ‘na bèla figura ala autonomia trentina. Ensoma, far-fale per no far faliment. Del tut. Cossa diselo el Potachin da Caden?
O’ vist che en Provincia i ghe dà la “Farfala d’oro” al Claudio Baglioni. No se sa el perché, nè per còssa, ma entant i ghe la dà e basta. Bravi. Cossì se fa! Chissenefrega dei motivi: el fen perché ne conven e ne va ben a noi che adess comanden e che quindi g’aven sempre reson.
Zerto che se a lù i ghe dà ‘sto premio, cossa doveressei darghe a quei che fa qualcoss tuti i dì per ‘sta tera? Penso al Punto d’Incontro; a quei de Trentino Solidale e a tuti quei che daverze le porte del cor e no le sèra pù. De spess senza dirlo. Se i ghe dà la Farfala al Claudio, a lori ghe vegniria de sicur l’aquila de San Venceslao. No se pòl? Ah, i ghe l’à zà empromessa a Orietta Berti, se la va en Pinè a cantar sul giazz? A ‘n altra de pù bele.
Tre malsaoridi i se la tòl col vescovo che fa el so’ mister, come l’à sempre fat. Bisogneria darghela anca a lori en premio: en bigatin de bronzo o en zimes de legn, perché i ne fa far propri bèla figura, come quei che i à volest lassarghe i onori al duce, che i n’à parlà enfin en Germania. Anca a questi en premio. Magari “la Tarma de arzent” envezi che la “Farfala de oro”, ma sempre qualcoss l’è. No ghè pù gnent che scandaliza ‘sta tera massa tesa. No ghè gnent che ne faga dir: basta! Basta concerti che costa milioni; basta morir de laoro e sul laoro; basta promese de tut, che po’ no le porta a gnent, come quele sul’Autostrada. I n’à sgionfà le rece a forza de dirne che no ghèra problemi e adess par che ghe la zontante. Bravi! Se bega per la Clara Marchetto, pace al’anima sua e no se diss gnent su quela roba for sul Fersena che par semrpe de pù en lager. L’è mesi che sentin prometer la soluzion dele liste per le visite dal medico e l’è mesi che sen sempre lì. Ma no ‘mporta gnent, perchè el problema che no ne fa dormir la not, l’è saver se el Maurizio el narà a Roma o se ‘l resterà a Trent, per seutar a no far gnent. Avanti cossì!
Ma i trentini quand’èlo che i se nascorzerà che i li stà tolendo per i maroni?
©Potachin-da-Caden