Ah per quelo, se el Potachin da Càden el vol deventar “Potachin da Zivezan”, no ghé Madone che tegna. Gnanca i Robamadòne, come che i li ciàma quei de Piné da quando ‘n del 1808 (mili-otozento-oto) i gà portà via ‘l quadro dela Madòna per méterlo en la ciésa de Zivezan. Alora ghèra càore e béchi. Adess le è deventàde pegore. Cossa diràlo el Potachin… che ‘l vol diventar da Zivezàn?
Adess basta. O’ deciso. Me tògo Zivezan (anca se el sindaco, el Paolo Beti, no l’è d’accordo). Tuti i pensa che scherzo, ma Zivezan l’è strategico per Trent: poderen cossì slargar i mercatini; far fòra en resort per i turisti al vècio forte e torne l’Arcipretale fata su dal Clesio. G’ò zà i reparti speciali de Schützen, pronti a ocupar Zivezan se no i me lo dà co’ le bòne. G’ò squadre d’asalto armade de canete, pive e fionde e coi giubòti anticanederlo. Son anca disposto a pagar quei da Zivezan, se i ghe stà a deventar zitadini de Trent.
O’ za fat i conti. Vendo la Music Arena a Vasco Rossi, che la ghe piass tant e ‘l po’ coltivarghe la “maria” e anca…. la Bepina e la ‘Miliòta; sposto l’ospedal a Cognola, che en postera l’è tant pù bel; zo al Mass Desert fago ‘na piantagion de ananas, che col cambiamento climatico i ven su pù dei fonghi; meto po’ i ananas nei stòi dela Busa con ‘na segiovia che va dentro e fòra; fago tut en tapirugant che dala Zervara l’ariva ala Forst de Ravina, portando turisti, stinchi e bire medie tuti ensema; po’ fago ‘na funivia che gira entorno al Calisio e ariva a Zivezan per via aerea. Fago en nòvo progeto per la Pirubi che el parte da Vicenza e l’ariva a Bolzan tut en galeria e con ‘na corsia da far demò en retromarcia, perché l’è questo el futuro, altro che monade…
Sona la sveglia e me desmissio. Tiro en rut e me nascorzo adess che la sera i peveroni ensema ai crauti no i digerisso. Penso a quanti piati che el ne magna Trump tute le sere… E torno a dormir.
El vos Potachin da…. Zivezan